|
Prosjektet Svalbard Pengar er eit prosjekt i regi av Grumant CO. COAL BAY. På nettsida til prosjektet er det mogleg å kjøpe både fysiske silketrykk og ei digital eining som blir kalla «kol». Desse vilkåra regulerer kjøp av desse produkta og er regulert av dei standardiserte salsvilkåra for forbrukarkjøp av varer over Internett, som du finn nedanfor. Forbrukarkjøp over Internett er hovudsakleg regulert av avtalelova, forbrukarkjøpslova, marknadsføringslova, angrerettlova og ehandelslova, og desse lovene gir forbrukaren ufråvikelege rettar. Lovene er tilgjengelege på www.lovdata.no Vilkåra i denne avtalen skal ikkje forståast som ei avgrensing i dei lovbestemte rettane, men stiller opp dei viktigaste rettane og pliktene til partane i handelen.
Prosjektet Svalbard Pengar sel ikkje kryptovalutaen ETH (ether) eller andre kryptovalutaer. Prosjektet tilbyr ei grafisk framstilling av samhandling mellom brukarar av nettsida og enkelte smarte kontraktar på ethereum-blokkjeda, i tillegg til grafiske framstillingar av enkelte ERC-721-tokens på ethereum-blokkjeda.
Den digitale eininga kol blir brukt til å låse opp tilgang til generering av ERC-721-tokens, som er kalla «digitale Svalbard-setlar». Har ein låst opp tilgang til generering av slike setlar, er det mogleg å «betale» smartkontrakten på ethereum-blokkjeda for å generere ein ny setel i form av ether. Denne «betalinga» går ikkje til prosjektet Svalbard Pengar, men til ethereum-blokkjeda.
Det er mogleg å både kjøpe og selje digitale Svalbard-setlar på nettsida. Betalinga for slike handlingar går til ethereum-blokkjeda, og sjølve oppgjeret for kjøp og sal går til kjøparen og seljaren. Ingen beløp som er inkluderte i desse prosessane, går til prosjektet Svalbard Pengar, og transaksjonane er regulerte av smarte kontraktar på ethereum-blokkjeda. Nettsida til prosjektet legg dermed berre til rette ei grafisk framstilling av samhandling med desse smarte kontraktane.
Grumant CO. COAL BAY, eller andre fysiske eller juridiske personar som er knytte til prosjektet Svalbard Pengar, er ikkje ansvarlege for eventuelle tap som er knytte til transaksjonar med ether (ETH), ERC-721-tokens eller andre samhandlingar med smarte kontraktar på ethereum-blokkjeda. All interaksjon med dette aspektet av prosjektet skjer på brukaren sitt eige ansvar. Verdien på dei digitale Svalbard-setlane blir styrt av tilbod og etterspurnad og kan vere null. Brukaren er sjølv ansvarleg for å setje seg inn i kva dei ulike smarte kontraktane brukaren interagerer med, gjer.
Avtalen omfattar desse salsvilkåra, opplysningar i bestillingsløysinga og eventuelt særskilt avtalte vilkår. Ved eventuell motstrid mellom opplysningane går det som er avtalt særskilt mellom partane, fremst, så sant det ikkje strir mot ufråvikeleg lovgiving.
Avtalen vil i tillegg bli utfylt av relevante lovføresegner som regulerer kjøp av varer mellom næringsdrivande og forbrukarar.
Seljaren er Grumant CO. COAL BAY, som vidare blir omtalt som seljar/seljaren.
Adresse: Storgata 65, 9008 TROMSØ
E-post: kontakt@svalbard.money
Org.nr: 935 985 234
Kjøparen er den forbrukaren som gjer bestillinga, som vidare blir omtalt som kjøpar/kjøparen.
Den opplyste prisen for vara og tenester er den totale prisen kjøparen skal betale. Denne prisen inkluderer alle avgifter og tilleggskostnader.
For silketrykk vil det komme fraktkostnader i tillegg til prisen for sjølve silketrykket. Fraktkostnader blir presenterte når leveringsadresse er fylt inn, før betalinga er fullført.
Andre kostnader som seljaren ikkje har informert om før kjøpet, skal kjøparen ikkje bere.
Avtalen er bindande for begge partar når kjøparen har sendt bestillinga si til seljaren.
Avtalen er likevel ikkje bindande dersom det har oppstått skrive- eller tastefeil i tilbodet frå seljaren i bestillingsløysinga i nettbutikken eller i bestillinga til kjøparen, og den andre parten innsåg eller burde ha innsett at det låg føre ein slik feil.
Seljaren kan krevje betaling for vara frå det tidspunkt kjøparen stadfestar kjøpet av vara på nettsida til prosjektet.
Dersom kjøparen nyttar kredittkort eller debetkort ved betaling, vil kortet bli belasta straks kjøparen har stadfesta betalinga på nettsida til prosjektet.
Levering har skjedd når kjøparen, eller representanten hans, har teke over tingen.
Silketrykk vil bli sende med sporing til den oppførte adressa til kjøparen.
Om ikkje leveringstidspunkt går fram av bestillingsløysinga, skal seljaren levere vara til kjøparen utan unødig opphald og seinast 30 dagar etter at kunden har bestilt. Vara skal leverast hos kjøparen med mindre noko anna er særskilt avtalt mellom partane.
Risikoen for vara går over på kjøparen når han, eller representanten hans, har fått vara levert i tråd med punkt 6.
Med mindre avtalen er unnateken angrerett, kan kjøparen angre kjøpet av vara etter angrerettlova.
Kjøparen må gi seljaren melding om bruk av angreretten innan 14 dagar frå fristen begynner å løpe. I fristen er alle kalenderdagar inkluderte. Dersom fristen endar på ein laurdag, heilagdag eller høgtidsdag, blir fristen forlengd til nærmaste yrkedag.
Angrefristen blir rekna som halden dersom meldinga er send før utgangen av fristen. Kjøparen har bevisbyrda for at angreretten er blitt gjord gjeldande, og meldinga bør derfor skje skriftleg (per e-post eller brev).
Nærmare om angrefristen:
Angrerett for kol gjeld berre for kol som er kjøpt. Angreretten gjeld berre dersom kolet ikkje er brukt på nettsida til å låse opp tilgang til produksjon av digitale setlar.
Angrefristen blir utvida til 12 månader etter utløpet av den opphavlege fristen dersom seljaren ikkje før avtalen blir inngått, opplyser om at det ligg føre angrerett og standardisert angreskjema. Det same gjeld ved manglande opplysning om vilkår, tidsfristar og framgangsmåte for å nytte angreretten. Sørgjer den næringsdrivande for å gi opplysningane i løpet av desse 12 månadene, går angrefristen likevel ut 14 dagar etter den dagen kjøparen fekk opplysningane.
Ved bruk av angreretten må vara leverast tilbake til seljaren utan unødig opphald og seinast 14 dagar etter at melding om bruk av angreretten er gitt. Kjøparen dekkjer dei direkte kostnadene ved å returnere vara, med mindre anna er avtalt eller seljaren har unnlate å opplyse om at kjøparen skal dekkje returkostnadene. Seljaren kan ikkje fastsetje gebyr for at kjøparen nyttar angreretten.
Seljaren er forplikta til å betale tilbake kjøpesummen til kjøparen utan unødig opphald og seinast 14 dagar frå seljaren fekk melding om at kjøparen hadde bestemt seg for å nytte angreretten. Seljaren har rett til å halde tilbake betalinga til han har fått varene frå kjøparen, eller til kjøparen har lagt fram dokumentasjon for at varene er sende tilbake.
Dersom seljaren ikkje leverer vara eller leverer henne for seint etter avtalen mellom partane, og dette ikkje har årsak i kjøparen eller forhold på kjøparen si side, kan kjøparen etter reglane i forbrukarkjøpslova kapittel 5 etter omstenda halde kjøpesummen tilbake, krevje oppfylling, heve avtalen og/eller krevje erstatning frå seljaren.
Ved krav om mishaldsverknader bør meldinga av bevisomsyn vere skriftleg (til dømes e-post).
Oppfylling
Kjøparen kan halde fast ved kjøpet og krevje oppfylling frå seljaren. Kjøparen kan likevel ikkje krevje oppfylling dersom det ligg føre ei hindring som seljaren ikkje kan overvinne, eller dersom oppfylling vil føre med seg ei så stor ulempe eller ein så stor kostnad for seljaren at det står i vesentleg misforhold til den interessa kjøparen har i at seljaren oppfyller. Skulle vanskane falle bort innan rimeleg tid, kan kjøparen likevel krevje oppfylling.
Kjøparen taper retten til å krevje oppfylling dersom han eller ho ventar urimeleg lenge med å fremje kravet.
Heving
Dersom seljaren ikkje leverer vara på leveringstidspunktet, skal kjøparen oppmode seljaren om å levere innan ein rimeleg tilleggsfrist for oppfylling. Dersom seljaren ikkje leverer vara innan tilleggsfristen, kan kjøparen heve kjøpet.
Kjøparen kan heve kjøpet omgåande dersom seljaren nektar å levere vara. Det same gjeld dersom levering til avtalt tid var avgjerande for at avtalen blei inngått, eller dersom kjøparen har underretta seljaren om at leveringstidspunktet er avgjerande.
Blir tingen levert etter tilleggsfristen forbrukaren har sett, eller etter leveringstidspunktet som var avgjerande for at avtalen blei inngått, må krav om heving gjerast gjeldande i rimeleg tid etter at kjøparen fekk vite om leveringa.
Erstatning
Kjøparen kan krevje erstatning for tap han lir som følgje av forseinkinga. Dette gjeld likevel ikkje dersom seljaren godtgjer at forseinkinga har årsak i hindring utanfor seljaren sin kontroll som det ikkje er rimeleg at han kunne teke omsyn til på avtaletidspunktet, unngått eller overvunne følgjene av.
Dersom det ligg føre ein mangel ved vara, må kjøparen innan rimeleg tid etter at mangelen blei oppdaga eller burde ha blitt oppdaga, gi seljaren melding om at han eller ho vil gjere mangelen gjeldande. Kjøparen har alltid reklamert tidsnok dersom det skjer innan to månader frå mangelen blei oppdaga eller burde blitt oppdaga. Reklamasjon kan skje seinast to år etter at kjøparen tok over vara. Dersom vara eller delar av henne er meint å vare vesentleg lenger enn to år, er reklamasjonsfristen fem år.
Dersom vara har ein mangel og dette ikkje har årsak i kjøparen eller forhold på kjøparen si side, kan kjøparen etter reglane i forbrukarkjøpslova kapittel 6 etter omstenda halde kjøpesummen tilbake, velje mellom retting og omlevering, krevje prisavslag, krevje avtalen heva og/eller krevje erstatning frå seljaren.
Reklamasjon til seljaren bør skje skriftleg.
Retting eller omlevering
Kjøparen kan velje mellom å krevje mangelen retta eller å få levert tilsvarande ting. Seljaren kan likevel motsetje seg kravet frå kjøparen dersom gjennomføringa av kravet er umogleg eller valdar seljaren urimelege kostnader. Retting eller omlevering skal gjerast innan rimeleg tid. Seljaren har i utgangspunktet ikkje rett til å gjere meir enn to rettingsforsøk for den same mangelen.
Prisavslag
Kjøparen kan krevje eit passande prisavslag dersom vara ikkje blir retta eller omlevert. Dette inneber at forholdet mellom nedsett og avtalt pris svarer til forholdet mellom verdien på tingen i mangelfull og kontraktmessig stand. Dersom særlege grunnar taler for det, kan prisavslaget i staden bli sett lik den påverknaden mangelen har på kjøparen.
Heving
Dersom vara ikkje er retta eller omlevert, kan kjøparen òg heve kjøpet når mangelen ikkje er uvesentleg.
Dersom kjøparen ikkje betaler eller oppfyller dei andre pliktene etter avtalen eller lova, og dette ikkje har årsak i seljaren eller forhold på seljaren si side, kan seljaren etter reglane i forbrukarkjøpslova kapittel 9 etter omstenda halde vara tilbake, krevje oppfylling av avtalen, krevje avtalen heva og/eller krevje erstatning frå kjøparen. Seljaren vil òg etter omstenda kunne krevje renter ved forseinka betaling, inkassogebyr og eit rimeleg gebyr ved uhenta varer.
Oppfylling
Seljaren kan halde fast ved kjøpet og krevje at kjøparen betaler kjøpesummen. Er vara ikkje levert, taper seljaren retten sin dersom han ventar urimeleg lenge med å fremje kravet.
Heving
Seljaren kan heve avtalen dersom det ligg føre vesentleg betalingsmishald eller anna vesentleg mishald frå kjøparen si side. Seljaren kan likevel ikkje heve dersom heile kjøpesummen er betalt. Fastset seljaren ein rimeleg tilleggsfrist for oppfylling og kjøparen ikkje betaler innan denne fristen, kan seljaren heve kjøpet.
Renter ved forseinka betaling/inkassogebyr
Dersom kjøparen ikkje betaler kjøpesummen etter avtalen, kan seljaren krevje renter av kjøpesummen etter forseinkingsrentelova. Ved manglande betaling kan kravet, etter forvarsel, bli sendt til inkasso. Kjøparen kan då bli halden ansvarleg for gebyr etter inkassolova.
Gebyr ved uhenta ikkje-forskotsbetalte varer
Dersom kjøparen unnlèt å hente ubetalte varer, kan seljaren belaste kjøparen med eit gebyr. Gebyret skal maksimalt dekkje dei faktiske utlegga seljaren har for å levere vara til kjøparen. Eit slikt gebyr kan ikkje belastast kjøparar under 18 år.
Behandlingsansvarleg for innsamla personopplysningar er seljaren. Med mindre kjøparen samtykkjer til noko anna, kan seljaren, i tråd med personopplysningslova, berre hente inn og lagre dei personopplysningane som er nødvendige for at seljaren skal kunne gjennomføre pliktene sine etter avtalen. Personopplysningane til kjøparen vil berre bli leverte ut til andre dersom det er nødvendig for at seljaren skal få gjennomført avtalen med kjøparen, eller i lovbestemte tilfelle.
Klager må rettast til seljaren i rimeleg tid, jf. punkt 9 og 10. Partane skal prøve å komme til ei minneleg løysing i eventuelle tvistar. Dersom dette ikkje lykkast, kan kjøparen ta kontakt med Forbrukarrådet for mekling. Forbrukarrådet er tilgjengeleg på telefon 23 40 05 00 eller www.forbrukerradet.no.
Klageportalen til Europakommisjonen kan òg brukast dersom du ønskjer å sende inn ei klage. Det er særleg relevant dersom du er forbrukar og busett i eit anna EU-land. Klaga sender du inn her: https://ec.europa.eu/odr.
VIDARE
Til hovudside